Денсаулық сақтау министрлігі ТМККК және МӘМС аясында көрсетілетін медициналық қызметтер мен дәрілік заттардың тізбесін әзірледі. Бұл тізімге орфандық және әлеуметтік маңызы бар ауруларды емдеуге арналған қызметтер мен дәрілер де енгізілген. Аталған қызметтер мен тауарлардың өткізу айналымдары қосылған құн салығынан (ҚҚС) босатылады. Сондай-ақ дәрілік заттарды импорттау кезінде ҚҚС-тан босату тәртібі де айқындалған.
Жоба қаулысында мыналар белгіленген:
• тегін медициналық көмектің кепілдік берілген көлемі (ТМККК) және міндетті әлеуметтік медициналық сақтандыру (МӘМС) аясындағы, сонымен қатар орфандық және әлеуметтік маңызы бар ауруларды емдеуге арналған медициналық қызметтердің тізбесі, олардың өткізу айналымдары ҚҚС-тан босатылады;
• ТМККК және МӘМС шеңберінде, сондай-ақ орфандық және әлеуметтік маңызы бар ауруларды емдеуге арналған дәрілік заттардың, оның ішінде фармацевтикалық субстанциялар мен балк-өнімдердің тізбесі, өткізу айналымдары ҚҚС-тан босатылады;
• ТМККК және МӘМС аясында, сондай-ақ орфандық және әлеуметтік маңызы бар ауруларды емдеуге арналған дәрілік заттардың импортына қатысты ҚҚС-тан босатылатын дәрілердің, фармацевтикалық субстанциялар мен балк-өнімдердің тізбесі;
• дәрілік заттарды импорттау кезінде ҚҚС-тан босату қағидалары.
Қаулы қабылданғаннан кейін:
• ТМККК және МӘМС аясында, сондай-ақ сирек (орфандық) және әлеуметтік маңызы бар ауруларды емдеуге арналған дәрілік препараттар ҚҚС-тан босатылады;
• медициналық қызметтер ҚҚС-сыз көрсетіледі;
• дәрілік заттарды Қазақстан аумағына әкелу кезінде соңғы тұтынушыға дейінгі барлық кезеңдерде ҚҚС жеңілдігі қолданылады.
Бұл науқастардың қажетті дәрі-дәрмектерді артық төлемсіз алуына және отандық компаниялардың қосымша қаржылық жүктемесіз жұмыс істеуіне мүмкіндік береді.
Денсаулық сақтау министрлігінің мәліметінше, бұл шара науқастарды қолдауға және емдеудің қолжетімділігін арттыруға бағытталған. ҚҚС-тан босату медициналық ұйымдар үшін қаржылық жүктемені азайтып, науқастардың мүмкіндіктерін кеңейтеді.
Құжат «Ашық НҚА» порталында 27 қазанға дейін көпшілік талқылауына ұсынылған.
