«15-тен астам соққы жасаған»: Астанада даму ерекшелігі бар жасөспірім соққыға жығылды
Шабуыл жасаған оқушының ата-анасы жауапкершілікке тартылды.
Астанада сөйлеу және психикалық дамуы тежелген мектеп оқушысы соққыға жығылған. Бұл ақпаратты елордалық полиция растады.
Оқиға туралы зардап шеккен баланың анасы айтып берген. Оның сөзінше, жасөспірімге мектептен шыққаннан кейін қатарластары ұрып-соққан.
«Ұлым сыныптан шыққан кезде оған артынан шабуыл жасады. Тұншықтырып, ұра бастады. Ұлыма 15-тен астам соққы жасалды. Басқалары қасында тұрып, ешкім кедергі келтірмесін деп балаларды ұстап тұрған. Ұлымда психикалық және сөйлеу дамуының тежелуі бар, ол өзіне не үшін бұлай істегендерін де толық түсінбеді. Ал айналасында балалар тұрды. Қарап тұрды. Күлді. Телефонға түсірді», – деп жазды әйел Instagram парақшасында.
Есіл аудандық полиция басқармасында шабуыл жасаған оқушының заңды өкілі бала тәрбиесіне қатысты міндеттерді орындамағаны үшін жауапкершілікке тартылғанын хабарлады. Аталған баптың санкциясы 10 АЕК көлеміндегі айыппұлды көздейді (2026 жылы – 43 250 теңге).
Сондай-ақ құқық қорғау органдары ата-аналармен және мектеп әкімшілігімен осындай жағдайлардың алдын алу және оқушылардың мінез-құлқын бақылауды күшейту бойынша профилактикалық кеңес өткізген.
