Астанада тәуекел тобына жататын балаларды сүйемелдеудің бірыңғай жүйесі құрылды
Астанада балалардың құқықтарын қорғау жүйесі күшейтілуде. Елордада тәуекел тобына жататын отбасыларды сүйемелдеуге арналған бірыңғай цифрлық платформа іске қосылды. Ал жыл басынан бері мемлекеттік органдар өмірлік қиын жағдайға тап болған балаларға көмек көрсету мақсатында 350-ден астам бірлескен рейд ұйымдастырды.
Бұл туралы Коммуникациялар қызметінде өткен брифингте Астана қаласының Балалардың құқықтарын қорғау басқармасының басшысы Серік Әділбай мәлімдеді.
Елордадағы балалар саны тұрақты өсіп келеді
Бүгінде Астанада 540 мыңнан астам бала тұрады.
Жыл сайын олардың саны 20 мыңнан астамға артып келеді. Сондықтан балалардың қауіпсіздігін қамтамасыз ету, олардың құқықтарын қорғау және отбасыларды қолдау қаланың әлеуметтік саясатының басым бағыттарының бірі болып отыр.
Серік Әділбайдың айтуынша, Балалардың құқықтарын қорғау басқармасы:
балалардың құқықтары мен заңды мүдделерін қорғайды;
бала құқықтарының бұзылуының алдын алады;
бұзылған құқықтарды қалпына келтіру жұмыстарын жүргізеді;
қорғаншылық және қамқоршылық мәселелерімен айналысады;
балалар мен отбасыларды сүйемелдеуді қамтамасыз етеді;
жеке профилактикалық жұмыстарды ұйымдастырады.
Балаларға арналған 83 іс-шарадан тұратын жоспар әзірленді
Басқарма жұмысы 2026–2030 жылдарға арналған «Қазақстан балалары» тұжырымдамасы аясында жүзеге асырылуда.
Құжат балалардың қауіпсіздігін қамтамасыз етуге, білім беру жүйесін дамытуға, денсаулықты қорғауға, отбасылық тәрбиені қолдауға және әлеуметтік қорғауды күшейтуге бағытталған 83 іс-шараны қамтиды.
«Балалардың құқықтарын қорғау жөніндегі кешенді шараларды тиімді іске асыру мақсатында Басқарма мемлекеттік органдармен, құқық қорғау құрылымдарымен және басқа да мүдделі ұйымдармен тығыз әрі үйлесімді өзара іс-қимыл жүргізіп келеді.
Өмірлік қиын жағдайға тап болған балалар анықталған кезде мемлекеттік және құқық қорғау органдарының әрекет ету алгоритмі бекітілді. Осы алгоритм аясында 2026 жылдың басынан бері 350-ден астам бірлескен рейд ұйымдастырылды.
Сүйемелдеуді қажет ететін балалар мен отбасылардың дерекқоры қалыптастырылып, оған 3 мыңнан астам кәмелетке толмаған бала енгізілді. Бұл санатқа кәмелетке толмағандардың істері және олардың құқықтарын қорғау жөніндегі комиссия қараған балалар, Отбасын қолдау орталығы мен Психологиялық қолдау орталығының сүйемелдеуіндегі балалар, ата-аналары балаларды тәрбиелеу, оқыту және асырау жөніндегі міндеттерін орындамайтын отбасылардағы балалар, мобильді топтар анықтаған балалар, бұрын балалардың құқықтарын қорғау функцияларын жүзеге асыратын ұйымдарда болған балалар, сондай-ақ білім беру ұйымдарының педагог-психологтары мен әлеуметтік педагогтарының бақылауындағы тәуекел тобына жататын балалар кіреді.
Ведомствоаралық сүйемелдеудің тиімділігін арттыру үшін пилоттық режимде тәуекел тобына жататын балалар мен отбасыларды есепке алу және сүйемелдеудің бірыңғай цифрлық платформасы іске қосылды. Бұл жүйе мемлекеттік органдар арасындағы ақпарат алмасуды жеделдетіп, әрбір отбасыға көрсетілетін көмектің сапасын арттыруға мүмкіндік береді», – деді Серік Әділбай.
Үш мыңнан астам бала сүйемелдеуде
Елордада ерекше назарды қажет ететін балалар мен отбасылардың бірыңғай дерекқоры қалыптастырылған.
Оған 3 мыңнан астам кәмелетке толмаған енгізілген. Олардың қатарында:
кәмелетке толмағандардың істері жөніндегі комиссия қараған балалар;
Отбасын қолдау орталығы сүйемелдейтін отбасылар;
Психологиялық қолдау орталығының сүйемелдеуіндегі балалар;
әлеуметтік қауіпті жағдайда тұрған отбасылардағы кәмелетке толмағандар;
мобильді топтар анықтаған балалар;
тәуекел тобына жататын жасөспірімдер бар.
Көмек көрсетуді үйлестіру мақсатында пилоттық режимде түрлі мемлекеттік органдардың ақпаратын біріктіретін және туындаған мәселелерге жедел әрекет етуге мүмкіндік беретін бірыңғай цифрлық платформа жұмысын бастады.
Ерекше назар – профилактикаға
Басым бағыттардың бірі – балалар жарақаты мен жазатайым оқиғалардың алдын алу.
Профилактикалық науқан аясында:
10 мыңнан астам ата-анаға түсіндіру жұмыстары жүргізілді;
тұрғын үй қауіпсіздігі бойынша чек-парақтар әзірленді;
ата-аналарға арналған жадынамалар шығарылды;
еңбек ұжымдарында қауіпсіздік бойынша бес минуттық нұсқамалар өткізілді;
балаларға арналған профилактикалық анимациялық бейнероликтер дайындалды.
Бұл неге маңызды?
Балалардың құқықтарын қорғау басқармасы кәмелетке толмағандардың қауіпсіздігі үшін негізгі жауапкершілік ата-аналарға жүктелетінін еске салады.
«Астана қаласының Балалардың құқықтарын қорғау басқармасы балалардың қауіпсіздігін қамтамасыз ету – ең алдымен ата-аналардың міндеті екенін ескертеді. Кәмелетке толмағандардың қауіпсіздігін қамтамасыз ету үшін балаларды қараусыз қалдырмау, терезелерге арнайы қорғаныс құрылғыларын орнату, балалардың жабдықталмаған жерлерде шомылуына жол бермеу және олардың интернеттегі қауіпсіздігіне ерекше көңіл бөлу ұсынылады», – деп түйіндеді спикер.
