Еңбек және халықты әлеуметтік қорғау министрлігі «Жұмыс іздеп жүрген адамдарды тіркеу», «Жұмыссыздарды тіркеу» және «Жұмысынан айырылу жағдайына әлеуметтік төлем тағайындау» мемлекеттік қызметтерін көрсетуге қатысты жаңа тәсілдерді енгізуді жоспарлап отыр.
Мемлекеттік қызметтерді көрсетуде кешенді тәсілді енгізу ұсынылып отыр. Бұл қазақстандықтарға уақытша төлем алып қана қоймай, тұрақты табысын тезірек қалпына келтіруге, жаңа кәсіп меңгеруге және еңбек қызметіне сенімді түрде оралуға мүмкіндік береді.
Жұмысынан айырылу жағдайына әлеуметтік төлем тағайындау тәртібі мен мерзімдері 2026 жылғы 1 қазаннан бастап өзгереді.
Атап айтқанда, жұмысынан айырылу жағдайына берілетін әлеуметтік төлемнің мерзімін алты айдан үш айға дейін қысқарту жоспарланып отыр.
Қазіргі уақытта төлем мөлшері соңғы 24 ай ішінде әлеуметтік аударымдар жүргізілген орташа айлық табыстың 45%-ын құрайды.
1 қазаннан бастап жұмысынан айырылу жағдайына әлеуметтік төлемнің ең жоғары мөлшерін жеті ең төменгі жалақы мөлшерінің 45%-ы деңгейінде белгілеу жоспарланып отыр.
Құжат 25 қыркүйекке дейін жария талқылау үшін «Ашық НҚА» сайтында орналастырылған.
