ҚР Қаржы нарығын реттеу және дамыту агенттігі 2026 жылғы 28 қыркүйектегі қаулысымен сақтандыру ұйымымен зейнетақы аннуитеті шартын жасасу және зейнетақы жинақтарын сақтандыру ұйымына, сондай-ақ БЖЗҚ-ға зейнетақы аннуитеті шарты бойынша аудару қағидаларына өзгерістер енгізді.
Өзгерістерге сәйкес шарт жасасу үшін қажетті құжаттар тізімі кеңейтілді.
Енді бұдан бөлек:
• дербес деректерді жинауға және өңдеуге келісім беру (жазбаша түрде немесе цифрлық сервистер арқылы электрондық форматта);
• мерзімсіз белгіленген I, II немесе III топтағы мүгедектіктің бар екені туралы мәліметтер талап етіледі.
Сақтандыру ұйымы мүгедектік туралы мәліметтерді сақтандыру жөніндегі бірыңғай деректер базасын қалыптастыру жөніндегі ұйым арқылы тексереді.
Зейнетақы аннуитеті шартын интернет-ресурс арқылы жасасу тәртібі өзгерді
Мұндай шартты жасасу кезінде сақтандыру ұйымы енді өтініш берушінің дербес деректерді жинауға, өңдеуге және оларды бірыңғай деректер базасын қалыптастыру жөніндегі ұйымға, жіберуші қорға және жіберуші сақтандыру ұйымына беруге электрондық нысанда келісімін алуға міндетті.
Зейнетақы жинақтарын аудару тәртібі өзгерді
Сақтандыру ұйымы мәліметтерді бірыңғай деректер базасын қалыптастыру жөніндегі ұйым арқылы жіберуші қорға жолдайды. Аударым жасауға бірыңғай деректер базасынан келіп түскен электрондық хабарлама негіз болады. Жіберуші қор хабарламаны 2 жұмыс күні ішінде тексереді.
Қаражатты аударудан бас тарту негіздерінің саны 8-ден 4-ке дейін қысқартылды.
Жіберуші қор мынадай жағдайларда зейнетақы жинақтарын аударудан бас тартады:
• өтініш берушінің жеке зейнетақы шотында зейнетақы жинақтарының болмауы немесе оның атына ашылған жеке зейнетақы шотының болмауы;
• зейнетақы жинақтарын аудару туралы хабарлама келіп түскен күндегі жағдай бойынша өтініш берушінің зейнетақы жарналарын есепке алуға арналған жеке зейнетақы шоттарындағы зейнетақы жинақтарының сомасы зейнетақы аннуитеті шартында көрсетілген зейнетақы жинақтарының сомасынан аз болуы;
• өтініш берушіде бірінші немесе екінші топтағы мүгедектіктің мерзімсіз белгіленгені туралы мәліметтердің болмауы;
• зейнетақы жинақтарын аудару туралы хабарлама келіп түскен күнге міндетті кәсіптік зейнетақы жарналарының жиынтық төлену мерзімі 60 күнтізбелік айдан аз болуы.
Жиынтық төлем хабарламасы 7 жұмыс күнінен кешіктірілмей қалыптастырылады. Бұған дейін бұл мерзім 10 жұмыс күнін құраған.
Сақтандыру ұйымы өтініш берушіні зейнетақы жинақтарының келіп түскені туралы 5 жұмыс күні ішінде хабардар етеді. Кастодиан-банк қаражатты төлем хабарламасын іске қосу күні сақтандыру ұйымына аударады.
Зейнетақы жинақтары қайтарылған жағдайда жіберуші қор қаражат сақтандыру ұйымынан қайтарылған күннен бастап 5 жұмыс күні ішінде өтініш берушіні жазбаша немесе өзге де тәсілмен хабардар етеді. Сақтандыру ұйымы зейнетақы жинақтарын қайтаруға арналған жиынтық төлем тапсырмасын қалыптастырады.
Сақтандыру ұйымы ауысқан кезде сатып алу сомасын аудару да бірыңғай деректер базасы арқылы жүзеге асырылады. Шартты бұзуға және зейнетақы жинақтарын аударуға бірыңғай деректер базасынан келіп түскен электрондық хабарлама негіз болады.
Электрондық деректер алмасу тәртібі де нақтыланды. Қатысушылар арасындағы келісімдерде электрондық хабарламалардың құрамы мен форматтары, оларды алғанын және өңдегенін растау, техникалық ақаулар болған жағдайда хабарламаларды қайта жіберу, сондай-ақ хабарламалардың қайталанып орындалуына жол бермеу үшін оларды сәйкестендіру тәртібі айқындалуға тиіс.
Жаңа редакция құжат айналымын жеделдетуге, қағаз түріндегі құжат айналымын қысқартуға және бірыңғай деректер базасын қалыптастыру жөніндегі ұйым арқылы деректер алмасуды орталықтандыруға бағытталған.
Қаулы 16 қазаннан бастап қолданысқа енгізіледі.
Бұған дейін Қазақстанда зейнетақы аннуитетінің үлгілік шарты өзгертілгенін хабарлаған болатынбыз.
