Қазақстанның кейбір өңірлерінде мүгедектігі бар азаматтарға мерекелік төлем беріледі
25 қазан – Республика күніне орай бірқатар өңірде азаматтардың жекелеген санаттарына біржолғы әлеуметтік көмек көрсетіледі. Белгілі болғандай, төлемді ең алдымен мүгедектігі бар адамдар, мүгедектігі бар балалар және басқа да мұқтаж азаматтар алады. Алайда өңірлердің басым бөлігінде бұл мерекеге орай арнайы төлем қарастырылмаған.
Біржолғы әлеуметтік көмек алты облыста көзделген.
Ақтөбе облысы. Мүгедектігі бойынша мемлекеттік әлеуметтік жәрдемақы алушыларға 56 225 теңгеден, ал мүгедектігі бар балаларға 12 450 теңгеден төленеді. Көмек шамамен 27,4 мың адамды қамтиды. Төлемді қазан айында жүргізу жоспарланған.
Атырау облысы. Барлық топтағы мүгедектігі бар адамдарға жылына бір рет 86 500 теңгеден беріледі. Бұл тізімге 18 жасқа толмаған балалар кірмейді. Төлемді I топтағы 3 083, II топтағы 9 833 және III топтағы 10 030 адам алады.
Қызылорда облысы. Барлық топтағы мүгедектігі бар адамдар мен мүгедектігі бар балаларға 12 975 теңгеден төленеді. 2026 жылы бұл көмекті 34 120 адам алады. Осы мақсатқа жергілікті бюджеттен 426,36 млн теңге бөлінген. 2027 жылға 485,84 млн теңге қарастырылған.
Павлодар облысы. I және II топтағы мүгедектігі бар адамдарға, сондай-ақ 18 жасқа дейінгі мүгедектігі бар балалары тәрбиеленіп отырған отбасыларға 5 АЕК мөлшерінде көмек беріледі.
Бұдан бөлек, әдетте Конституция күніне орай төленетін жәрдемақылардың бір бөлігі биыл Республика күніне ауыстырылған. Осыған байланысты қазан айында мүгедектігі бар балалары бар отбасыларға 20 АЕК, ақылы бөлімде оқитын колледж студенттеріне 30 АЕК, ал жоғары оқу орындарында ақылы негізде білім алатын студенттерге 60 АЕК төленеді.
Бұл мақсатқа 748,4 млн теңге бөлінген. Көмек 17,9 мыңнан астам адамды қамтиды. Келесі жылы бұл төлемдерді наурыз айында, Конституция күніне орай беру жоспарланып отыр.
Түркістан облысы. Әртүрлі санаттағы 760 адамға жалпы сомасы 15,6 млн теңге көлемінде көмек көрсетіледі. Алушылар қатарында мүгедектігі бар адамдар, мүгедектігі бар балалар, қарт адамдар, жетім балалар, сондай-ақ «Қазақстанның Еңбек Ері» және «Еңбек Даңқы» ордендерінің иегерлері бар.
Қаражаттың бір бөлігі жергілікті бюджеттерден, екінші бөлігі демеушілер есебінен бөлінеді. Кентау қаласында бюджеттен 15,1 млн теңге, Ордабасы ауданында 64 мың теңге қарастырылған. Ал Қазығұрт ауданында 400 мың теңге, Төлеби ауданында 76 мың теңге демеушілер есебінен беріледі.
Батыс Қазақстан облысы. 18 жасқа дейінгі 3 356 мүгедектігі бар балаға 20 мың теңгеден төленеді. Осы мақсатқа өңір бюджетінен 67,1 млн теңге қарастырылған.
Қалған өңірлерде Республика күніне орай мұндай арнайы төлем көзделмеген. Олардың қатарында Абай, Ақмола, Алматы, Шығыс Қазақстан, Жамбыл, Жетісу, Қарағанды, Қостанай, Маңғыстау, Солтүстік Қазақстан және Ұлытау облыстары, сондай-ақ Алматы, Астана және Шымкент қалалары бар.
АЕК мөлшері
2026 жылы айлық есептік көрсеткіш (АЕК) мөлшері 4 325 теңгені құрайды.
2026 жылы Республика күні жексенбіге сәйкес келеді. Осыған байланысты демалыс күні 26 қазан, дүйсенбіге ауыстырылады. Бес күндік жұмыс аптасында 24, 25 және 26 қазан күндері қатарынан демалыс болады.
