Абай облысында ерекше қажеттіліктері бар балаларға қатысты 100-ден астам зорлық-зомбылық фактісі анықталды
Балалардың құқықтарын қорғау мақсатында Абай облысының прокуратурасы арнаулы әлеуметтік қызметтер көрсету орталықтарына тексеру жүргізуді бастады.
Аягөз ауданындағы Арнаулы әлеуметтік қызметтер көрсету орталығын тексеру барысында санитарлар тарапынан тәрбиеленушілерге жүйелі түрде физикалық және психологиялық зорлық-зомбылық көрсетудің 100-ден астам фактісі анықталды. Прокуратураның мәліметінше, қызметкерлер тәрбиеленушілердің дәрменсіз жағдайын пайдаланған.
Сонымен қатар құқыққа қайшы әрекеттерге куә бола тұра, олардың жолын кесу үшін шара қолданбаған жекелеген қызметкерлердің әрекетсіздігі анықталды.
Осы факті бойынша прокуратура Қазақстан Республикасы Қылмыстық кодексінің 140-бабының 3-бөлігі бойынша сотқа дейінгі тергеп-тексеруді бастады.
Тәрбиеленушілердің қауіпсіздігін қамтамасыз ету мақсатында іске қатысы барлық адамдар қызметтік міндеттерін атқарудан шеттетіліп, олардың балалармен байланысуына шектеу қойылды.
Абай облысының прокуратурасы балалардың құқықтары мен заңды мүдделерін қорғау, сондай-ақ олардың қауіпсіздігін қамтамасыз ету ведомство жұмысының басым бағыттары болып қала беретінін атап өтті.
Тексеру шаралары жалғасып жатыр.
