Астанада өткен «Балалар Фэст – 2026» инклюзивті фестиваліне 200-ден астам адам қатысты
Астанадағы «Балалар Фест – 2026» республикалық инклюзивті фестиваліне 200-ден астам адам қатысты.
Астанадағы Әл-Фараби атындағы Оқушылар сарайында түрлі мүмкіндігі бар балаларды, олардың ата-аналарын, педагогтер мен қоғамдық ұйымдардың өкілдерін біріктірген «Балалар Фест – 2026» республикалық инклюзивті фестивалі өтті. Бұл туралы Астана қаласы әкімдігінің ресми сайты хабарлады.
Екінші жыл қатарынан өткізіліп отырған іс-шараны Қазақстан әйелдер күштері альянсының Астана қаласындағы өкілдігі елордалық Білім басқармасының қолдауымен ұйымдастырды.
Бүгінде Қазақстанда ерекше білім беру қажеттіліктері бар 235 мыңнан астам бала тұрады. Фестиваль олар үшін көпшілік іс-шараға қатысумен ғана шектелмей, назар орталығында болуға, сахнаға шығып, өнерін көрсетуге және көрермендердің қолдауын сезінуге мүмкіндік берді.
Фестивальге 200-ден астам адам қатысты. Олардың қатарында 50-ге жуық бала, мектеп оқушылары, үкіметтік емес ұйымдардың, әлеуметтік жобалар мен бизнес өкілдері, шығармашылық ұжымдар және еріктілер болды.
Жас қонақтарға арналған ойын-сауық бағдарламасы мазмұнды әрі қызықты өтті. Аниматорлар қатысушыларды ойындар мен байқаулар арқылы қарсы алса, сиқырлы трюктер мен көгершіндер қатысқан шоу балаларға ерекше әсер сыйлады. Қатысушылар гүл шоқтарын құрастыру және хош иістер жасау бойынша шығармашылық шеберлік сабақтарына қатысты. Сондай-ақ қонақтарға аквагрим, тәттілер мен шоколадты фонтан ұсынылды.
Бағдарламаның маңызды бөлігі түрлі мүмкіндігі бар жас өнерпаздарды біріктірген концерт болды. Бір сахнада мектептер мен оңалту орталықтарының өкілдері, үкіметтік емес ұйымдар мен әлеуметтік жобаларға қатысатын балалар, әншілер, би және театр ұжымдары өнер көрсетті. Сонымен қатар сән көрсетілімдері мен авторлық шығармашылық қойылымдар ұйымдастырылды.
Фестивальдің басты қағидаларының бірі – барлық баланың тең дәрежеде қатысуын қамтамасыз ету. Көптеген қатысушы үшін сахнаға шығу өз мүмкіндіктерін танытуға, өзіне деген сенімділігін арттыруға және айналасындағылардың қолдауын сезінуге жол ашты.
Ұйымдастырушылар ерекше білім беру қажеттіліктері бар балаларды тәрбиелеп отырған аналарды қолдауға да ерекше мән берді. Фестиваль отбасыларға олардың жалғыз емес екенін, ал балаларының назарға, сүйіспеншілікке және өз қабілеттерін жүзеге асыруға мүмкіндік алуға лайық екенін еске салды. Мұндай бастамалар әр адамның даралығын бағалайтын және оның қоғамдық өмірге қатысу құқығын құрметтейтін ашық қоғам қалыптастыруға ықпал етеді.
«Балалар Фест» жай ғана мерекелік іс-шара емес, инклюзия, толеранттылық және тең мүмкіндіктер идеяларын ілгерілетуге арналған алаңға айналды.
