Елорда әкімдігі алдағы 7 мамыр — Отан қорғаушылар күні мен 9 мамыр — Жеңіс күні мерекелеріне жоспарланған іс-шаралардың тізімін жариялады. Карантиндік шектеулерге байланысты барлық іс-шаралар онлайн тәртіпте өтеді, — деп хабарлайды қала әкімінің баспасөз қызметі.
№4 қалалық емханада Ұлы Отан соғысының ардагерлері мен оларға теңестірілген жандарға медициналық тексерулер ұйымдастырылады. №2 қалалық емхана Ұлы Отан соғысының ардагерлеріне үйде күтім жасау бойынша дәрігерлердің кеңесін ұсынады. Бұл шаралар 6 мамырға дейін жалғасады.
«АЛЖИР» саяси қуғын-сүргін және тоталитаризм құрбандарының мұражай-мемориалдық кешені» «Малиновка» іздестіру клубымен бірлесе отырып 5 мамыр күні тыл ардагерлерімен,«Афганистандағы мүгедектер мен соғыс ардагерлерінің одағы» ҚБ Целиноград ауданы өкілдерімен, әскери қызметкерлермен «Ерлікке — тағзым, ардагерге — құрмет» атты тақырыпта кездесу өткізеді.
Сондай-ақ 5-10 мамыр аралығында Ұлы Отан соғысы жауынгерлері құрметіне арналған монументальді кешенге, «Отан қорғаушылар» мемориалды кешеніне, М.Маметова, Б.Момышұлы ескерткіштеріне онлайн тур өтеді. Толығырақ ақпаратты Мәдениет басқармасынан, Біріккен мұрағаттар дирекциясынан, Тарихи-мәдени мұраларды сақтау орталығынан алуға болады.
7 мамыр күні — Отан қорғаушылар күнінде «Қазақстан» телеарнасы «Ақиқат пен аңыз» атты концерт-пьесасын ұсынады.
ANK Live студиясында тікелей эфирде ҚР Қорғаныс министрлігінің өкілдерімен іс-шара өткізіледі. Іс-шараны онлайн форматта Instagram, Facebook әлеуметтік желілерінен көруге болады.
8 мамыр күні «Нұр-Сұлтан» филармониясы оркестрінің қатысуымен Ұлы Отан соғысының 22 ардагеріне арналған көшпелі концерт өтеді. Сол күні «Жас сарбаз» әскери-патриоттық жобасы аясында ардагерлерге азық-түлік себеттері таратылады.
9 мамыр күні Ұлы Жеңіс күніне орай елорда көшелерінде «Жеңіс жолдары» мобильді іс-шарасы өтеді. Дәл осы күні «Хабар» телеарнасында «Ер есімі — ел есінде» концерті өтеді.
Шенеуніктер елордадағы барлық іс-шаралар санитарлық нормаларға толық сәйкес өтеді деп уәде береді.
Источник: Newtimes
