ҚР Мәдениет және спорт вице-министрі Ерлан Қожағапанов республикалық спорт ұйымдарын әлеуметтік қолдау шаралары туралы баяндады.
«Пандемия кезінде мемлекет республикалық спорт ұйымдарын әлеуметтік қолдау және қаржыландыру шараларын тоқтатқан жоқ. 2020 жылдың 1 қаңтарынан бастап спорт саласындағы мамандандырылған мектептер мен колледж қызметкерлерінің жалақысы көбейді, ол 2023 жылға дейін жыл сайын 25% өседі», — деді Ерлан Қожағапанов Мәжілістің әлеуметтік-мәдени даму комитетінің отырысында.
Сонымен бірге мемлекеттік білім беру ұйымдарының мұғалімдеріне мектептен тыс спорт түрлерін өткізгені үшін негізгі лауазымдық жалақысының 100% мөлшерінде қосымша төлем енгізу туралы мәселе шешілді. «Сондай-ақ кәсіпқой спорт клубтарын ұстауға бөлінген қаржылық ресурстарды қайта бөлу, тұрғындарды, ең алдымен балаларды дене шынықтыру мен бұқаралық спортқа тарту (ЖҰЖ 74 тармақ) бойынша шаралар қабылдануда», — деді спикер.
Осыған байланысты министрлік жаңа жұмыстың бағыттарын әзірледі:
— бюджет қаражаты және квазимемлекеттік сектор есебінен спортшының рұқсат етілген ең жоғары жалақысын 2 миллион теңгеден аспайтын мөлшерде анықтау;
— кәсіби спорт клубтарын ұстауға мемлекеттік бюджеттен және квазимемлекеттік сектордан бөлінетін қаражаттың шекті мөлшерін футбол және шайбалы хоккейге 1,2 млрд.теңгеден аспайтын және басқа ойын түрлеріне 450 млн.теңгеден аспайтын мөлшерде белгілеу.
