Қаржы мониторингі агенттігінің Солтүстік Қазақстан облысы бойынша департаменті азаматтарға табысына қарамастан баспана алуға көмектесу мақсатында қаржы пирамидасын ұйымдастыру фактісі бойынша қылмыстық істі тергеп жатыр, деп хабарлайды ҚР ҚМА қызметі.
Ұйымдастырушылар әлеуметтік желілер мен WhatsApp мессенджері арқылы жеке тұлғаларға «Шаңырақ+» бағдарламасы бойынша ипотекалық несиеге балама ұсынып, хабарлама таратқан.
Бағдарламаға қатысу үшін 103 доллар салып, жаңа салымшыларды шақыру қажет болған.
Серіктестіктің филиалдарында жүргізілген жедел-іздестіру іс-шаралары барысында серіктестік қызметі, келісім-шарттар, тізімдер және салымшылар туралы мәліметтері бар баспа өнімдері, буклеттер, брошюралар табылып, тәркіленген.
Аталған факті бойынша сотқа дейінгі тергеу амалдары басталған. Тергеу мүддесі үшін басқа мәліметтер жария етілмейді.
Тұтыну кооперативтері пирамидалық схемалардың бірі болып табылады. Алаяқтар үй немесе көлік сатып алу бағдарламасын ұсынады.
Көбінесе мұндай клубқа кіру үшін мүшелік жарна талап етіледі және ол жарна қайтарылмайды. Бұл ретте жылжымайтын мүлік жаңа инвесторлардың жарналары есебінен сатып алынады.
«Құрметті азаматтар, егер сіз немесе сіздің жақындарыңыз осындай пирамидаға алданған болсаңыздар, дереу қаржы мониторингі агенттігіне +7 (7172) 708-478 сенім телефоны арқылы немесе аумақтық қаржы мониторингі органдарына хабарласыңыз», — делінген хабарламада.
