Атырауда зағип және нашар көретін балаларға қазақ, орыс және ағылшын тілін үйренуге арналған Брайль шрифтілі электронды оқу құралдары берілді.
Атырау қаласында «Атырау облысы білім басқармасының облыстық арнайы мектеп-интернаты» КМБ тифлопедагогтарының тапсырысы бойынша «SEZUAL» мемлекеттік білім беру мекемесі әзірлеген қазақ, орыс және ағылшын тілдеріндегі 45 электронды Брайль шрифтімен өздігінен оқуға арналған әдістемелік құралды табыстау рәсімі өтті. Оларды сатып алуға жергілікті компаниялардың бірі көмектесті.
«Брайль жүйесін оқуға арналған мобильді электронды-алфавиттік жаттықтырушысы Қазақстанда және әлемде көру қабілеті бұзылған балалардың сауаттылығы мәселесін сәтті шешеді. Өнертабыс БҰҰ-ның 17 орнықты даму мақсатының білім беру саласындағы үшінші, төртінші және сегізінші мақсаттарына сәйкес келеді. Брайль қарпімен жазылған өздігінен оқу кітабының әріптерді, сандарды және арифметикалық белгілерді үйретудегі тиімділігі дәлелденген», — дейді Атырау облысы білім басқармасына қарасты «Аймақтық арнайы мектеп-интернатының» басшысы Ләззат Жайшылыққызы.
Бұл технологияның арқасында оқушылар өткен сабақ материалдарын өз бетінше қайталауға мүмкіндік алады, аппарат Брайль санау жүйесін өз бетінше бекітуге ықпал етеді және мұғалімнің уақытын үнемдейді.
