Ерекше қажеттіліктері бар қазақстандықтарға 1 қыркүйектен бастап жәрдемақыны көтереді
29 наурызда Мемлекет басшысы Қасым-Жомарт Тоқаев VIII сайланған Қазақстан Республикасы Парламентінің бірінші сессиясының ашылуында ерекше қажеттіліктері бар азаматтарға берілетін жәрдемақы 1 қыркүйектен бастап 14,5 пайызға өсетінін айтты.
Елімізде 700 мыңнан астам тұратын ерекше қажеттіліктері бар азаматтарға 1 қыркүйектен бастап жәрдемақы 14,5 пайызға өсетін болады», — деді Мемлекет басшысы.
Оның айтуынша, олар жоғары инфляцияның әсерін, атап айтқанда, азық-түлік пен дәрі-дәрмек бағасының өсуін қатты сезінеді.
«Ерекше қажеттіліктері бар адамдар мен оларға қамқорлық жасайтындарды қолдау шараларын күшейту керек. Сондай-ақ отбасында асыраушысынан айырылған азаматтарды да назардан тыс қалдыруға болмайды». Қасым-Жомарт Тоқаев
Мемлекет басшысы Үкіметке 2023 жылдың 1 қыркүйегінен бастап осы санаттағы тұлғаларға берілетін жәрдемақыны 14,5 пайызға арттыруды тапсырды.
Оның айтуынша, Қазақстан өңірімізде мұндай әлеуметтік қолдау көрсетіп отырған жалғыз мемлекет деуге толық негіз бар. Тұтастай алғанда, мемлекеттік әлеуметтік қолдау жүйесі белсенді және одан да мақсатты болуы керек. Дегенмен, кез келген көмек тәуелділікті тудырмауы керек. Бұл, ең алдымен, тек жәрдемақыға сенетін еңбекке қабілетті жас азаматтарға қатысты. Бұл дені сау, қайратты азаматтар үшін ұят әрекет.
Бұл ретте, зиянды еңбек жағдайында жұмыс істейтін жұмысшыларға ерекше назар аудару керектігін атап өтті. Бұл санат үшін отандық және халықаралық тәжірибені толықтай зерделеуді ескере отырып, арнайы төлемдерді енгізу қажет.
«Еңбек саласында мемлекет көмегі ең алдымен олардың салдарын жоюға емес, әлеуметтік тәуекелдердің мақсатты түрде алдын алуға бағытталуы керек. Парламент пен Үкімет бұл саладағы жұмысты тығыз үйлестіруі қажет», — деді мемлекет басшысы.
Елбасы Қазақстан халықтық партиясы мен Жалпыұлттық социал-демократиялық партиядан өкілдік ететін депутаттар маңызды әлеуметтік мәселелерді шешуге белсене атсалысатынына сенімді.
Бұған дейін Қасым-Жомарт Тоқаев қазақстандықтар үшін тұрғын үйді арзандату туралы айтқан болатын.
