Алматы облысындағы балалар лагерлерінің жартысына жуығы рұқсатсыз және заң бұзушылықтарға жол беріп жұмыс істеген, деп хабарлайды Бас прокуратураның баспасөз қызметі.
«Алматы облысында 22 балалар лагерінің сегізі өз қызметін уәкілетті органдардың рұқсатынсыз және санитарлық-эпидемиологиялық, өртке қарсы ережелерді бұза отырып жүргізген. Әрбір екінші балалар мекемесінде ойын алаңдары мен спорт алаңдарының қауіпсіздік талаптарының сақталмағаны анықталды. Жатақханалар күрделі жөндеуді қажет етеді. Бұл ретте төрт балаға арналған бөлмелерде сегіз немесе одан да көп адамдар қоныстандырылған», — делінген жұма күні хабарламада.
Қонаев қаласындағы «Бәйтерек» лагерінде мемлекеттік сатып алу туралы шарттың талаптарына қайшы, балалардың демалысы мен білім алуы дұрыс ұйымдастырылмаған.
«Қапшағай су қоймасында шомылу кезінде балалардың қауіпсіздігі қамтамасыз етілмеген. Оның үстіне лагерь директоры жұмыс орнында алкогольдік масаң күйде болған», — деп мәлімдеді қадағалау органы.
Директор ҚР ӘҚБтК-нің 440-бабы (алкогольдік ішімдіктерді ішу немесе қоғамдық орындарға мас күйде келу) бойынша әкімшілік жауапкершілікке тартылды.
«Тексеру нәтижелері бойынша балалар лагерьлері әкімшілігінің кәмелетке толмағандарды тәрбиелеу жөніндегі міндеттерін орындамауына байланысты (ҚК 140-бабының 2-бөлігі бойынша) сотқа дейінгі тергеп-тексеру басталды», — деп хабарлады прокурор.
