Мемлекет басшысы Қ.Тоқаев «Әділетті мемлекет. Біріккен ұлт. Өркендеген қоғам» халыққа Жолдауында 2022 жылғы 1 қыркүйекте Үкіметке «…оқушылардың жекелеген әлеуметтік осал санаттарының тұрмыстық шығындарын субсидиялау мүмкіндігін пысықтауды» тапсырды. Жаңа оқу жылы қарсаңында Мемлекет басшысының тапсырмаларын жүзеге асыру аясында Үкімет тиісті қаулы қабылдады.
Атап айтқанда Премьер-Министрдің баспасөз хатшысы Динара Әлімованың айтуынша, әлеуметтік көмек алатын азаматтарға әлеуметтік көмек көрсету қағидаларына өзгерістер мен толықтырулар енгізілді, азаматтардың жекелеген санаттары үшін колледждер мен университеттердегі оқу кезеңінде жатақханад тұру үшін өтемақы төлеу қарастырылған.
Жетім балалар мен ата-анасының қамқорлығынсыз қалған балаларға, сондай-ақ мүгедектігі бар азаматтарға өтемақы төленеді.
Жатақханада тұру үшін өтемақы мөлшері жылына 29 айлық есептік көрсеткішті құрайтын болады.
Барлығы 7145 адам өтемақы алады. Оның ішінде 4 651 адам жетім және ата-анасының қамқорлығынсыз қалған студенттер, 2 494 адам мүгедектігі бар жандар, бала кезінен мүгедектігі бар азаматтар, мүмкіндігі шектеулі балалар.
Бұл шығындар 2023 жылға арналып бекітілген республикалық бюджет, сондай-ақ 2024-2026 жылдарға арналған бюджет лимиті шегінде қарастырылады.
