Давид Дегтярев Ханчжоуда өтіп жатқан Азия Паралимпиада ойындарында Қазақстан құрамасына алғашқы алтынды әкелді.
54 келіге дейінгі салмақтағы пауэрлифтингші Азия ойындарында жалпы есепте 186 келі салмақта рекорд орнатып, алтынға қол жеткізді.
Сондай-ақ пауэрлифтингтен 41 келі салмақта сынға түскен Тұрсынай Қабыл күміс жүлдегер атанды.
Бірінші орын Қытайдан келген спортшыға бұйырды.
Бұған дейін қазақстандық параспортшы Бибарыс Спатай параканоэда екінші орын алған болатын, оның нәтижесі 43,601 секунд болды.
Ал Максим Богатырев параканоэде 58,479 секунд нәтиже көрсетіп, қола жүлдені жеңіп алды.
Қазақстандық Жаңыл Балтабаева VL3 200 метрге жеке бағдарламада каноэмен есуде үшінші орын алды.
Алғашқы екі орынды Өзбекстан мен Қытайдың параспортшылары иеленді.
