Нұра ауданында 20 ниет білдірген кәсіпкер өз ісін ашып, дамытуға грант алды. Оның жетеуі – мүгедектігі бар жандар.
Диана Ахметова өзінің арманын орындады – ол Ахмет ауылында сұлулық салонын ашты. Қыздың есту қабілеті бұзылған. Бірақ ол шаштараз, визажист, кірпік өсіру және шугаринг мамандығын сәтті игерген және осы уақытқа дейін клиенттерін үйде қабылдаған. Ал «Бастау Бизнес» курсын аяқтаған соң грантқа өтініш білдіріп, сұлулық студиясын ашуды жөн көрген.
Мен 2018 жылдан бері сұлулық индустриясындамын. Бастапқыда мен «Салон Мастер» макияж курсынан өттім. Содан кейін кірпік өсіруді, шугарингті, шаш қиюды үйрендім. Содан «Бастау Бизнес» курсын оқып, өз бетімше бизнес-жоспар құрастырып, 950 мың теңге грантқа ие болдым. Бұл қаражатқа салонға құрал-жабдық сатып алдым. Мен Ахмет кентіндегі сауда орталығынан үй-жай жалдап салон аштым. Қазір 20-ға жуық тұрақты клиентім бар. Мен олардың әдемі және сенімді болуына көмектесемін, — дейді Диана Ахметова.
Қарой ауылының 48 жастағы бесаспап шебері Дос Төлегенов автокөлік жөндеу шеберханасын дамытуға 1,3 миллион теңге грант алған. Ұзақ уақыт ДЦП дертіне шалдыққан азамат үлкен ұлы Нұрасыл екеуі электр құрылғыларын, теледидарларды жөндеп, шағын бөлмеде жұмыс істеген.
Кәсіпкер биылғы жылы көрсетілетін қызмет түрін кеңейтуді ұйғарып, үйінің жанынан көлік жөндеу шеберханасын жабдықтаған.
«Жақсы автоэлектриктер өте аз. Мен өмір бойы осы салада жұмыс істеп келемін, әртүрлі құрылғылар мен қондырғыларды жөндедім, көлік иелері жиі хабарласады, сондықтан мен автоэлектрик қызметін көрсетуді шештім. Үш көлікке арналған гаражым бар, алдағы уақытта бес адамды субсидияланған жұмысқа орналастыруды жоспарлап отырмын. Қазір ұлым маған көмектесуде, ол колледжде автоэлектрик мамандығы бойынша оқиды. Грант маған көп көмектесті, көлік ақауларын диагностикалау үшін қымбат тұратын жабдық сатып алдым. Болашақта автомобиль көтергішін алғым келеді» — дейді Дос Төлегенов.
Сондай-ақ мүмкіндігі шектеулі кәсіпкерлер Нұра ауданында сиыр мен ешкі сүтін қабылдайтын және өңдейтін цех, тігін цехы, құс өсіретін шағын фермалар ашты.
