Прокурорлар қаладағы банк бөлімшелерінің барлығы дерлік қолжетімділік стандарттарына сай келмейтінін анықтады.
Алматы қаласы Медеу ауданының прокуратурасы мүмкіндігі шектеулі жандардың құқықтарының бұзылуын анықтады, деп хабарлайды қадағалау органы.
Прокуратура қызметкерлерімен әңгімелесу барысында мүгедектігі бар азаматтар қоғамының өкілдері қаладағы екінші деңгейлі банк бөлімшелерінің қолжетімділігінің жеткіліксіздігі мәселесіне назар аударды. Прокурорлар қаладағы банк бөлімшелерінің барлығы дерлік қолжетімділік стандарттарына сәйкес келмейтінін анықтады: пандустар, мнемоникалық диаграммалар, арнайы кассалар және басқа да қажетті құрылғылар не талапқа сай емес, тіпті мүлдем жоқ болып шықты. Алматыда 50 мыңнан астам мүмкіндігі шектеулі жан тұрады.
«Еңбек және халықты әлеуметтік қорғау комитетінің Алматы қаласы бойынша департаменті анықтаған заң бұзушылықтар бойынша қадағалау органы 13 коммерциялық банкке қатысты әкімшілік іс қозғап, нәтижесінде ҚР «Әкімшілік құқық бұзушылық туралы» Кодексінің 83-бабы бойынша 9 миллионнан астам сомаға айыппұл салынды», — делінген қадағалау органының хабарламасында.
Уәкілетті орган барлық банктерге заң бұзушылықтарды жою және мүмкіндігі шектеулі жандарға қолайлы жағдай жасау туралы ұйғарым шығарды. Қазір сегіз банк өз филиалдарын қолжетімділік стандарттарына сәйкестендірді, қалғандары қажетті шараларды белсенді түрде жүзеге асыруда, деп қосты Алматы прокуратурасы.
