Солтүстік Қазақстан облысында белгісіз біреулер мүгедектігі бар азаматқа 280 мың теңгеге жуық несие рәсімдеген.
Солтүстік Қазақстан облысының прокурорлары психикалық ауруына байланысты екінші топтағы мүгедектігі бар тұрғынға заңсыз 279 780 теңге несие беру фактісін анықтады.
Осыған байланысты қадағалау органы несие шартын жарамсыз деп тану туралы талап арызбен сотқа жүгінді.
«Сот шешімімен прокурордың талаптары қанағаттандырылды, несие шарты жарамсыз деп танылды, әрекетке қабілетсіз тұлғаның құқықтары қалпына келтірілді», — делінген облыс прокуратурасының сайтында.
Аталған факті бойынша ҚР Қылмыстық кодексінің 190-бабының 2-бөлігінің 4-тармағы бойынша сотқа дейінгі тергеп-тексеру амалдары басталып, тергеу амалдары жүргізілуде.
Қазақстан Республикасы Қылмыстық кодексінің 190-бабының 2-бөлігінің 4-тармағына сәйкес, ақпараттық жүйені пайдаланушыны алдау немесе сеніміне қиянат жасау арқылы жасалған алаяқтық: түзеу жұмыстарымен немесе 4 мың АЕК (13,8 млн теңге)дейін айыппұлмен;
немесе 1000 сағатқа дейінгі мерзімге қоғамдық жұмыстарға тарту;
шектеу немесе 4 жылға дейін бас бостандығынан айыру.
Сондай-ақ адам белгілі бір лауазымдарды атқару немесе белгілі бір қызметпен айналысу құқығынан 3 жылға дейін айырылуы мүмкін.
