Өткен жылы Батыс Қазақстан облысында медициналық мекемелер – 4 дәрігерлік амбулатория және 7 фельдшерлік-акушерлік пункт салынды.
«Ауылдық денсаулық сақтауды жаңғырту» ұлттық жобасы аясында ел Президенті Қасым-Жомарт Тоқаевтың тапсырмасы бойынша облыста барлығы 50 медициналық нысанның құрылысы жоспарланған. Бүгінгі күні пайдалануға беру жоспарланған 12 медициналық нысанның 5-і іске қосылды.
Батыс Қазақстан облысы Теректі ауданы Сарыөмір ауылында қазан айында жаңа дәрігерлік амбулатория пайдалануға берілді. Медициналық мекеме ғимараты пилоттық жоба аясында салынды
Дәрігерлік амбулатория тәулігіне 35 адамды қабылдай алады, заманауи медициналық құрал-жабдықтармен жабдықталған және ауылдағы 22 адамды жұмыспен қамтамасыз етеді. Дәрігерлік амбулатория жалпы тәжірибелік дәрігер кабинеті, емдеу кабинеті, физиотерапия кабинеті, стоматологиялық кабинеттер, акушер-гинеколог кабинеті, зертханалар, дәріхана, сау бала бөлмесі және т.б. кабинеттерден тұрады.
Батыс Қазақстанның Бәйтерек ауданы Асан ауылында 2 мыңға жуық тұрғынға қызмет көрсететін екінші дәрігерлік амбулатория пайдалануға берілді.
Дәрігерлік амбулатория орталықтандырылған сумен, автономды жылумен және газдандырумен қамтамасыз етілген. Сондай-ақ бейнебақылау камералары, қажетті техника, жиһаз және медициналық қондырғыларды қамтитын заманауи құрылғылармен жабдықталған. Жаңа дәрігерлік амбулатория халыққа көрсетілетін медициналық көмектің сапасын арттырады.
Сондай-ақ Новенький ауылында, Пятимар, Қызылоба ауылдарында жаңа медициналық нысандар ашылды.
