Бұл күндері астаналықтардың 5 мың отбасына қала билігі мен демеушілер тарапынан азық-түлік пакеттері таратылуда. Еріктілер 45 тонна азық-түлік таратты. Жинақтар көп балалы отбасыларға, зейнеткерлерге, сондай-ақ ерекше балаларды тәрбиелеп отырған отбасыларға жіберіледі.
Өтіп бара жатқан жылдың соңғы күндерінде еріктілердің жұмысы қызу. Таңертеңнен бастап қоймалардан қорап-қорап жинайды. Олардың әрқайсысы мекен-жай бойынша жеткізілуі тиіс. Әкімдік кәсіпкерлер қауымының қайырымдылыққа көбірек тартылып жатқанын атап өтеді. Мәселен, биылғы жылдың басынан бері кәсіпкерлердің қаржылық қолдауымен 15 әлеуметтік іс-шара жүзеге асырылған.
Қуаныш Молдабек, Астана қаласы әкімінің кеңесшісі:
— Жыл басында біз, қала әкімдігі Qazaq Oil компаниясымен халықтың әлеуметтік осал топтарына көмек көрсету туралы бірлескен меморандумға қол қойдық. Жыл басынан бері 4 мың отбасы қамтылды. Жаңа жыл қарсаңында бүгін 1 мың отбасына да ең қажетті тауарлар мен азық-түлік пакеттері беріледі. Бір қорап шамамен 45 келі, барлығы 45 тонна азық-түлік қала бойынша еріктілердің көмегімен таратылады.
Ақмарал Бағдай жұбайымен бірге 2 қыз тәрбиелеп отыр, үлкенінде – денсаулық мүмкіндігі шектеулі. Елордаға 2 жыл бұрын Алматыдан көшіп келген отбасы бүгінде баспананы жалға алып отыр. Ақмарал тұрғын үй бағдарламасының шарттарын түсіндіру үшін кеңеске шақырылды.
Ақмарал Бағадай, Астана қаласының тұрғыны:
— Мереке қарсаңында олар бізге осындай сыйлық әкелді, мен өте қуаныштымын және ризамын. Баршаңызды келе жатқан Жаңа жыл мерекесімен құттықтаймын, барша қазақстандықтарға үйлеріне жылулық пен жайлылық, денсаулық пен көтеріңкі көңіл-күй тілеймін! Биылдың өзінде 50 мың отбасына қала басшылығы тарапынан көмек көрсетілсе, мереке қарсаңында 40 мың бала ойын-сауық пен сыйлықтармен ертеңгілікке шақырылуда.
