11 ақпаннан бастап Қазақстанда 1 адамға шаққандағы тұтыну көлемінің белгіленген нормасы шегінде ауыз су қызметтеріне тұтыну көлемі бойынша саралау тетігі енгізілді. Яғни, қазір бүкіл ел бойынша тұтынушылар үшін төрт деңгейлі тариф белгіленуде.
Ауыз су тарифі, Қазақстан Республикасы Су ресурстары және ирригация министрлігінің мәліметі бойынша, топтар бойынша келесідей сараланады:
I топ – тұтыну мөлшері айына 3 м3 дейін, қолданыстағы тариф қолданылады (халықтың 49%-ы тұтынады);
II топ – айына 3-тен 5 м3-ге дейін тұтыну кезінде тариф ағымдағы тарифтен +20%-ға жоғары (халықтың 20%-ы тұтынатын);
ІІІ топ – айына 5 м3-ден 10 м3-ге дейін тұтыну кезінде тариф ағымдағы тарифтен +50% жоғары (халықтың 20% тұтынатын);
IV топ – айына 10 м3 жоғары тұтыну кезінде тариф қолданыстағы тарифтен 100% жоғары немесе 2 есе жоғары (халықтың 11% тұтынған).
«Осы тәсілді қолданған кезде Ұлттық экономика министрлігінің деректері бойынша ел бойынша қосымша табыс шамамен 13 млрд теңгені құрайды.Бұл қаражатты табиғи монополиялар субъектілері желілер мен жабдықтарды реконструкциялау, желілердің тозу деңгейін төмендету және шығындарды азайту үшін нысаналы мақсаты бойынша жіберуге міндетті», — деді министр Нұржан Нұржігітов Мәжілісте өткен дөңгелек үстел барысында.
