Елордалық пара спортшы Айсұлу Сүлейменова халықаралық турнирдің күміс жүлдегері атанды
Астана қаласының пара спортшысы Айсұлу Сүлейменова Дубай қаласында өткен жеңіл атлетикадан «Dubai 2024 World Para Athletics Grand Prix 15th Fazza International Athletics Championships» турнирінде 62 класы бойынша сәтті өнер көрсетіп, жеңіс тұғырынан көрінді, деп хабарлайды елорда әкімдігінің ресми сайты.
Осылайша жерлесіміз халықаралық жарыстың күміс жүлдегері атанды.
Айта кетейік, бұл турнир спортшының бірінші халықаралық жарысы.
«Жалпы жарыс қиын болды. Бірақ соған қарамастан бар күшімді салып, жеңіске жетуге тырыстым. Бұл менің алғашқы жарысым болғандықтан, өте қуаныштымын. Айтулы жеңіс менің ғана емес, барша команданың жеңісі деп санаймын. Әсіресе, жеке бапкерім Айгүл Аржаниковаға шексіз алғысымды білдіремін. Қолдау көрсеткендердің барлығына алғыс айтамын, әсіресе, қалалық спорт басқармасына және елордалық «Елорда» спорт клубының әкімшілігіне қолдау көрсеткені үшін алғысымды білдіргім келеді», — деді пара спортшы.
Бүгін елордалықтар Дубай қаласынан жүлделі екінші орын иеленген Айсұлуды халықаралық әуежайдан қарсы алды.
Жанкүйерлері мен жақын достары астаналық пара спортшыны құшақ жая қарсы алып, ерекше құрмет көрсетті.
Кеше Астана халықаралық әуежайында Айсұланы жанкүйерлері, отбасы мен достары құшақ жая қарсы алды.
