Іс «Адам саудасы» бабы бойынша сотқа жіберілді.
Психикалық дертке шалдыққан адамдарды құрылыс жұмыстарына пайдаланған Семей қаласының №1 арнаулы қызмет көрсету орталығының директорына қатысты іс бойынша тергеу жүріп жатыр, деп хабарлайды Абай облысының прокуратурасы.
Оқиғаны прокуратура тергеу барысында анықтады. Арнайы қызмет көрсету орталығының директоры шаруа қожалығында құрылыс жұмыстары кезінде психикалық дертке шалдыққан төрт жанды пайдаланған.
Тергеуді облыстық прокуратураның сотқа дейінгі тергеу басқармасы «Адам саудасы» бабы бойынша жүргізді. Қазір іс сотқа жіберілді.
Сондай-ақ мекеме әкімшілігі мен қызметкерлері дертке шалдыққан жандарды техникалық қызметкерлердің орнына палаталарды жууға пайдаланып, үй-жайларды тазалауға мәжбүрлеп, тамақ дайындауға рұқсат беріп, қабілетсіз адамдарды заңсыз әрекеттерге тартып, есепшоттарынан ақша жымқырған. Осы істердің барлығы бойынша да сотқа дейінгі тергеу амалдары жүргізілуде.
