Осы демалыс күндері, 12-13 қазанда Астанада Алматы, Жетісу, Батыс Қазақстан және Павлодар облыстарының тауар өндірушілерінің қатысуымен ауыл шаруашылығы жәрмеңкесі өтеді, деп хабарлайды елорда әкімдігінің ресми сайты.
Төрт облыстың диқандары Астанаға 900 тоннадан астам ауыл шаруашылығы өнімін әкелмек. Сатылатын тауарлар тізімінде: ет, көкөністер мен жемістер, сүт өнімдері, өсімдік майы, бал, балық, шұжық, қант, түрлі кондитерлік өнімдер бар.
Өнімнің негізгі үлесін Павлодар облысының тауар өндірушілері ұсынатын болады – шамамен 550 тонна азық-түлік сатылмақ. Оның басым бөлігі облысқа аты шыққан картоп, көкөніс және бақша дақылдары.
Жетісу өңірінің диқандары 120 тоннадан астам өнім әкеледі: жаңа піскен жемістер мен жидектер, ет, картоп, көкөністер мен қант.
Алматы облысы елордада 200 тоннаға жуық өнім сатады, оның тек төрттен бір бөлігін көкөністер мен жемістер құрайды, оның ішінде алматылық атақты «Апорт» сортындағы алма бар.
Батыс Қазақстан облысы сізді көптеген ет өнімдерімен, отандық ұнмен және макарон өнімдерімен қуантады.
Елорда тұрғындары мен қонақтары диқандардан тікелей өнім алып қана қоймай, өкілдік ететін өңірлер өнерпаздарының қатысуымен концерттік бағдарламаны тамашалайды. Жәрмеңке сағат 9:00-ден 18:00-ге дейін ашық болады.
Биыл жәрмеңке Қарқаралы тас жолындағы «Қазанат» ипподромына қарама-қарсы жерде өтіп жатыр. Елорда тұрғындары мен қонақтарына ыңғайлы болу үшін жәрмеңкелер кезінде № 18, 37, 303 және 323 бағыттағы автобустар қатынайтын болады.
Жәрмеңкелер 27 қазанға дейін демалыс күндері өтеді.
