«Кәсіби стандарттар жүйесін жетілдіру және әлеуметтік қызметкерлерді даярлау» атты дөңгелек үстел барысында Қазақстан Республикасы Еңбек және халықты әлеуметтік қорғау вице-министрі Асқарбек Ертаев Қазақстан Республикасы Парламенті Сенатының депутаттарына Ұлттық біліктілік жүйесін (ҰБЖ) жетілдіру жөніндегі департаменттің жоспарларымен және Қазақстан Республикасының азаматтарын әлеуметтік қорғау саласындағы әзірленген құралдарды тәжірибеде қолданумен таныстырды.
Шараға Сенат депутаттары, мүдделі мемлекеттік органдардың, үкіметтік емес ұйымдардың, салалық кеңестердің өкілдері, сала мамандары қатысты.
Асқарбек Ертаев өз сөзінде мамандарды даярлау сапасын сақтау, еңбек ұтқырлығын арттыру және жұмыс берушілердің сенімін нығайту үшін біліктілікті танудың тиімді жүйесі қажет екенін айтты.
Мамандарды даярлаудың еңбек нарығының талаптарына сәйкес болуын қамтамасыз ету үшін біліктілікті тұрақты тәуелсіз бағалау қажет. Кәсіби біліктілікті тану бойынша кәсіптер тізіліміне 513 кәсіп енгізілген, оның ішінде 377-сі ерікті, 136-сы міндетті түрде танылады.
«Жұмысшы мамандықтары жылы аясында IT және әлеуметтік салада үш саланы тану орталығы іске қосылды, сондай-ақ екі халықаралық орталық ашу жоспарлануда, 10-нан астам аймақтық орталықтар құру, жұмыссыздарға ваучерлік жүйені дамыту, колледждер мен университет түлектерін тәуелсіз бағалауды енгізу жоспарлануда», — деді ол.
Вице-министрдің айтуынша, кәсіби стандарттарды әзірлеуден бастап біліктілікті тануға дейінгі толық циклді қамтитын бүкіл біліктілік жүйесін ауқымды цифрлық трансформациялау жүргізілуде. Ұлттық біліктілік жүйесі цифрландыру аясында қызметтердің тиімділігі мен қолжетімділігін арттыруға бағытталған заманауи құралдар енгізілуде.
«Career Enbek цифрлық платформасы Ұлттық біліктілік жүйесінің барлық негізгі құралдарын жинақтайды.Платформа «бір терезе» қағидаты бойынша азаматтарға, сарапшыларға, жұмыс берушілерге және мемлекеттік органдарға қолжетімді ақпараттық өзек және оқыту ортасы ретінде жұмыс істейді. Ол негізгі секторлардағы, соның ішінде энергетика, ақпараттық технологиялар, туризм және әлеуметтік қорғау салаларындағы 7 тану орталығын аккредитациялайды», — деді Асқарбек Ертаев.
Жасанды интеллект дағдыларды талдау және мансаптық траекторияларды құру үшін қолданылады, сарапшыларды тексеру модулі енгізіледі.
Келесі маңызды бағыт – ҰБЖ құралдарын экономиканың басым секторларында және бірінші кезекте жаңа тәсілдер мен стандарттарды енгізу жағдайында кадрларды жаңарту мәселесі ерекше өткір тұрған әлеуметтік қорғау саласында практикалық қолдану.
Бұл салада 40 мыңға жуық маман, оның ішінде 12,3 мың әлеуметтік қызметкер жұмыс істейді. Оның үстіне қызметкерлердің үштен бірінен астамы 51 жастан асқандар, бұл жұмыс күшін жасарту, жаңа мамандарды даярлау қажеттігін көрсетеді.
Электрондық еңбек биржасында 3,1 мыңнан астам бос жұмыс орны бар; әлеуметтік қызметкерлер, әлеуметтік педагогтар, әлеуметтік қорғау қызметінің мамандары ерекше сұранысқа ие. 2030 жылға қарай кадрларға деген қажеттілік 15 мыңнан астам адамды құрайды.
«АҚШ, Ұлыбритания, Финляндия және Австралия сияқты елдерде лицензиялау жүйесі бар, оқыту бакалавриат және магистратура деңгейінде жүргізіледі, міндетті кәсіби стандарттар мен білім беру бағдарламаларын аккредиттеу енгізілді.
Біз үшін әлеуметтік қызметкер тек қамқорлық пен кеңес беретін маман ғана емес, сонымен қатар әлеуметтік тәуекелдердің алдын алу және халықтың осал топтарының құқықтарын қорғау жүйесінің негізгі буыны екенін түсіну принципті маңызды.
Әлеуметтік көмектің сапасы мамандардың дайындығы мен мәртебесіне тікелей байланысты екенін халықаралық тәжірибе растап отыр», — деді вице-министр.
Халықты әлеуметтік қорғау саласындағы біліктілік талаптарын күшейту шеңберінде 38 кәсіпке, оның ішінде әлеуметтік жұмыс, арнаулы және әлеуметтік қызметтерге арналған кәсіби стандарттар қайта қаралды.
Жаңа мамандықтар енгізілді: әлеуметтік көмекші, әлеуметтік қызметкердің көмекшісі, іс жүргізушісі, әлеуметтік жұмыс менеджері.
Жаңартылған кәсіби стандарттар мен құзыреттерге қойылатын жаңа талаптарды ескере отырып, Skills Enbek онлайн-платформасында біліктілігін арттырудан өткен әлеуметтік қорғау саласында жұмысқа орналасқан 12,3 мың маманның тізілімі қалыптастырылды.
Әлеуметтік қызметкерлердің біліктілігін бағалау және тану жұмыстары басталды.
