Елордада Астана күніне арналған спорттық шаралар аясында зейнеткерлер, мүмкіндігі шектеулі жандар, жасөспірімдер интеллектуалдық спорттан сынға түсті, деп хабарлады қала әкімдігінің ресми сайты.
Паралимпиадалық жаттығу орталығында ұйымдастырылған бәсекеге 40-қа жуық жан жиналып, командалық сайыс түрінде жүлдеге таласты.
«Нұра ауданымен бірге ұйымдастырылып жатқан шарамыз төртінші рет өткізіліп жатыр. Биылғы басты ерекшелігіміз – зейнеткерлерді қосуды жөн көрдік. Себебі қаламыздағы «Белсенді ұзақ өмір сүру орталығы» мүшелері әуесқойлар арасында қаламен ғана шектелмей, республикалық жарыстарда биіктен көрініп жүр. Олардың деңгейлері жасөспірімдерге жақсы тәжірибе болмақ», – деді Астана қаласы әкімдігінің Спорттық-бұқаралық іс-шараларды өткізу дирекциясының маманы Гүлнұр Базарханова.
Осы орайда «Белсенді ұзақ өмір сүру орталығының» қатысушысы Талғат Смағұлов тоғызқұмалақтың қаламызда қарқынды дамып жатқанын атап өтті.
«Тоғызқұмалақ – қазақ халқының дәстүрлі интеллектуалды ойыны. Сондықтан 2 жыл бұрын осы спорт түрін игеруді жөн көрдім. Үйрену барысында ата-бабамыздың ақылдылығына, есепке жүйріктігіне таңғалдым. Осы ойын арқылы ми
белсенді түрде жұмыс істейді. Мен баратын орталықтың өзінде 60-70 адам үнемі өзара талас-тартысқа түсіп жатады. Жоғары бәсекелестіктің арқасында бірқатар жетістікке де жетіп үлгердім», — деді зейнеткер Талғат Смағұлов.
Жарыс соңында қатысушылар медаль мен арнайы естелік сыйлықтармен марапатталды.
