Астанада жеті баланың анасын заңсыз түрде тұрғын үй кезегінен алып тастаған: оның құқығы кассацияда қалпына келтірілді
Бұған себеп бұрынғы санитарлық және техникалық талаптарға сай келмейтін тұрғын үйдің болуы еді.
Астанада «Алтын алқа» белгісімен марапатталған жеті баланың анасын тұрғын үй кезегінен заңсыз алып тастағаны туралы Жоғарғы сотта хабарланды.
Әйел 2009 жылдан бері мемлекеттік қызметші әрі көпбалалы ана ретінде кезекте тұрған. Оны күйеуінің және туысының өткен уақытта меншік құқығында болған жылжымайтын мүлкіне қатысты ақпаратқа байланысты кезектен шығарып тастаған. Әйелге қалалық тұрғын үй инспекциясымен ұзақ уақыт соттасуға тура келген.
«Бірінші және апелляциялық сатыдағы соттар тұрғын үй инспекциясының әрекетін заңсыз деп танып, әйелді тұрғын үй кезегіне қайта қоюды міндеттеді. Әкімшілік істер жөніндегі кассациялық сот бұл шешімдердің заңдылығын растады», – делінген хабарламада.
Жоғарғы сотта атап өткендей, «Алтын алқа» иегерлері, мұқтаж деп танылып, белгіленген тәртіппен тұрғын үй кезегіне қойылған аналар кезектен шығарылуға тиіс емес.
«Өткен уақытта санитарлық және техникалық талаптарға сай келмейтін тұрғын үйдің болуы, егер азамат қазіргі кезде мұқтаж күйінде қалып отырса, кезектен шығару үшін негіз бола алмайды», – деп толықтырды Жоғарғы сотта.
