Финляндиядағы инклюзия тәжірибесі
Финляндия инклюзияны белсенді түрде енгізу және білім беру сапасы бойынша әлемдегі көшбасшылардың бірі болып саналады. Мемлекет әр баланың тұрғылықты жеріне немесе физикалық ерекшеліктеріне қарамастан, білімнің кез келген сатысында тең мүмкіндік береді. Мектептерде ерекше білім беру қажеттіліктері бар балаларға көмектесетін мамандар жұмыс істейді, ал мұғалімдер инклюзивті білім беру бойынша арнайы дайындықтан өтеді.
Оқушылар мектепке тегін тасымалмен, ыстық тамақпен, кеңсе тауарларымен және оқулықтармен қамтамасыз етіледі. Қозғалысы шектеулі балаларға қажетті жабдықтар мен жеке көмекші беріледі. Ал есту қабілеті бұзылған балаларды сабақ кезінде сурдоаудармашы ертіп жүреді.
Канададағы инклюзия принциптері
Канадада 2008 жылдан бері ерекше қажеттіліктері бар балаларға арналған инклюзивті білім беру бағдарламасы іске асырылып келеді. Бұл бастама барлық отбасыларға сапалы, қолжетімді, икемді және инклюзивті ерте білім беру мен балаларға күтім жасау бағдарламаларына қолжетімділікті қамтамасыз етуге бағытталған. Мұндай бағдарламалар мемлекет тарапынан, сондай-ақ жеке қайырымдылық қорлар есебінен қаржыландырылады.
Сонымен қатар Канадада инклюзивті білім беру тек ерекше білім беру қажеттіліктері бар балаларға ғана емес, түрлі мәдени және тілдік топтардан шыққан барлық оқушыларға да қолданылады. Канада — әлемдегі ең көпұлтты елдердің бірі. Мектеп оқушыларының шамамен 40%-ы иммигранттар. Осыған байланысты білім беру мекемелері мұндай оқушыларды қолдауға бағытталған арнайы бағдарламалар әзірлейді және жүзеге асырады. Бұл балалардың мектепке тез бейімделуіне көмектеседі.
Балаларға көмектесетін робот-аватарлар
Жапония мектептерінде оқытуды барлығына қолжетімді ету мақсатында заманауи технологиялар белсенді түрде енгізіліп жатыр. Робот-көмекшілер мен арнайы қосымшалар аутизм және басқа да ерекшеліктері бар балаларға айналасындағылармен қарым-қатынас жасауға және сабақтарға белсенді қатысуға мүмкіндік береді.
Мысалы, егер бала ауруханада жатса немесе басқа себептермен мектепке бара алмаса, ол Жапонияда арнайы робот-аватар арқылы достарымен және сыныптастарымен байланыса алады. Құрылғы камерамен, микрофонмен және динамиктермен жабдықталған және баланың оқу процесінен тыс қалмауына көмектеседі.
Инклюзияны дамытуда елдегі мектеп қауымдастықтары мен ата-аналардың рөлі де зор — олар бірлескен іс-шаралар мен төзімділік сабақтары арқылы бұл бағытты қолдайды.
