Ақмола облысының 1700-ден астам тұрғыны медициналық-әлеуметтік сараптамадан өту үшін электрондық кезек қызметін пайдаланды
ҚР Еңбек және халықты әлеуметтік қорғау министрлігі Әлеуметтік саладағы мемлекеттік қызметтерді жетілдіру жөніндегі жоспарлы жұмыс шеңберінде мүгедектікті жеке белгілеу кезінде электрондық кезекті енгізу жөніндегі пилоттық жобаның алғашқы нәтижелері туралы хабарлайды. Жоба 2025 жылғы 20 қарашада Ақмола облысында іске қосылған сәттен бастап жаңа цифрлық қызметті 1700-ден астам азамат сәтті пайдаланды.
Бұл бастама қызмет алушыларға медициналық-әлеуметтік сараптама бөлімдеріне алдын ала жазылу арқылы баруды ұйымдастыруға мүмкіндік береді. Жүйенің енгізілуі азаматтарға келу уақытын алдын ала жоспарлап, өзіне ыңғайлы күн мен уақытты таңдауға жағдай жасап, мемлекеттік қызметті алу қолайлылығын едәуір арттырды және тірі кезекте күтуді болдырмайды.
Жазылу рәсімі Әлеуметтік қызметтер порталында (aleumet.egov.kz) жүзеге асырылған және пайдаланушылар үшін барынша жеңілдетілген. Уақытты брондау үшін азамат электрондық цифрлық қолтаңба арқылы порталға кіріп, жеке кабинеттен тиісті қызметті таңдауы қажет. Жүйе өтініш берушінің аумақтық орналасуына қарай қажетті медициналық-әлеуметтік сараптама бөлімін автоматты түрде анықтайды.
Брондау сәтті аяқталғаннан кейін пайдаланушының ұялы телефон нөміріне күні, уақыты, бөлімнің мекенжайы және талон нөмірі көрсетілген толық ақпарат қамтылған SMS-хабарлама жіберіледі. Қосымша ыңғайлылық үшін келуге үш күн қалғанда қайта SMS-еске салу қарастырылған. Қажет болған жағдайда азаматтар жеке кабинет арқылы броньды жоя алады, ал белгіленген уақытта келмеген жағдайда жүйе жазбаны автоматты түрде өшіріп, бұл туралы пайдаланушыға хабарлама жібереді.
Ақмола облысындағы пилоттық жоба осы жылдың желтоқсанына дейін жалғасады. Жоба аяқталғаннан кейін Министрлік жүйенің тиімділігіне талдау жүргізіп, электрондық кезекті елдің барлық өңірлеріне енгізу мәселесі бойынша шешім қабылдайды.
