Астанада ҚР Еңбек және халықты әлеуметтік қорғау бірінші вице-министрі Ербол Туяқбаевтың БҰҰ-ның даму құқығы мәселелері жөніндегі арнайы баяндамашысы Сурья Девамен кездесуі өтті.
Тараптар цифрлық трансформацияның Қазақстандағы әлеуметтік қолдау жүйесіне және азаматтардың әлеуметтік құқықтарын іске асыруға әсерін талқылады.
Цифрландыру – әлеуметтік саясаттың құралы
Ербол Тұяқбаев БҰҰ өкіліне халықты әлеуметтік қолдаудың ашықтығы мен тиімділігін арттыру мақсатында Қазақстан Үкіметі жүзеге асырып жатқан жүйелі шаралар туралы айтты.
Мемлекеттің проактивті көмек көрсету моделіне көшуіне мүмкіндік беретін цифрлық шешімдерді дамытуға ерекше назар аударылды.
«Цифрлық отбасы картасы» және проактивті қолдау
Талқылау барысында әртүрлі мемлекеттік органдардың деректерін біріктіріп, үй шаруашылықтарының әл-ауқат деңгейін бағалауға мүмкіндік беретін «Цифрлық отбасы картасына» ерекше көңіл бөлінді.
«Біз әлеуметтік саланы цифрландыруды ең алдымен азаматтардың құқықтарын қорғау тетігі ретінде қарастырамыз. Цифрлық отбасы картасының арқасында мемлекет бүгінде азаматтың қажеттілігін оның өзі жүгінбей тұрып анықтай алады. Ерекше назар дағдарыстық жағдайдағы отбасыларды қолдауға бағытталған, бұл даму құқығы қағидаттарымен тікелей үндеседі», – деді Ербол Туяқбаев.
Жүйе азаматтардың қажеттіліктерін ерте кезеңде анықтап, көмекті дәстүрлі өтініш беру тәртібіне қарағанда жедел әрі нақты көрсетуге мүмкіндік береді.
Бірыңғай стандарттар және қолжетімді қолдау
Бірінші вице-министр Қазақстандағы әлеуметтік қолдау шаралары бірыңғайландырылып, негізгі бағыттарға топтастырылғанын айтты.
Оның сөзінше, бірыңғай цифрлық платформа:
елдің барлық өңірлерінде әлеуметтік қолдау шараларына тең қолжетімділікті;
әлеуметтік көмек көрсетудің бірыңғай стандарттарын;
мемлекеттік ресурстарды бөлудің ашықтығын қамтамасыз етеді.
Атаулы әлеуметтік көмекке көзқарастың өзгеруі
Кездесу барысында атаулы әлеуметтік көмекті (АӘК) трансформациялау мәселесі де талқыланды. Қазақстан біртіндеп тек төлемге емес, азаматтардың еңбек әлеуетін дамытуға бағытталған модельге көшіп жатыр.
«Біз шартты көмек көрсету моделіне көшудеміз. Еңбекке қабілетті азаматтар үшін АӘК жай ғана төлем емес, даму құралына айналуда: оқыту, микронесиелеу және жұмысқа орналастыруға жәрдемдесу арқылы біз отбасыларға мұқтаждар санатынан өз бетінше шығуға көмектесеміз. Біздің түпкі мақсатымыз – отбасының әл-ауқатын дағдарыс деңгейінен тұрақты деңгейге көтеру», – деп түсіндірді бірінші вице-министр.
БҰҰ-мен ынтымақтастық және алдағы қадамдар
Кездесу соңында тараптар әлеуметтік саланы цифрландыру және әлеуметтік кепілдіктерді нығайту бағытындағы ынтымақтастықты одан әрі жалғастырудың маңызын атап өтті.
Ербол Туяқбаев Қазақстанның әлеуметтік қорғау ұлттық жүйесін халықаралық стандарттар мен БҰҰ ұсынымдарына сәйкес дамытуға дайын екенін растады.
