Астанада 14 жастан асқан жастар мен жасөспірімдерге арналған мамандандырылған бос жұмыс орындары жәрмеңкесі өтті, деп хабарлайды елорда әкімдігінің ресми сайты.
Жәрмеңке елордадағы TANYM көпфункционалды кешенінде ұйымдастырылды.
Іс-шараны Астана қаласы әкімдігінің Еңбек мобильділігі орталығы өткізді. Оның мақсаты – жасөспірімдерге жазғы уақытта уақытша жұмыс табуға көмектесу, оларды еңбек нарығымен таныстыру және алғашқы ресми еңбек тәжірибесін алуға мүмкіндік беру.
Жәрмеңке барысында қаладағы 28 жұмыс беруші талапкерлерге музыканттан бастап тігіншіге дейінгі түрлі бағыттағы 161 бос жұмыс орнын ұсынды.
№3 балалар музыка мектебі жас пианистерді, домбырашыларды және концертмейстерлерді жұмысқа шақырды.
Сондай-ақ қалада кесімді ақы төленетін тігіншілерге сұраныс жоғары екені айтылды.
Қызмет көрсету және маркетинг саласында компаниялар промоутерлерді, буып-түюшілерді, қаптаушыларды, өндірістік желі операторларын, қалыптаушыларды, жинақтаушы-буып-түюшілерді және техникалық қызметкерлерді белсенді түрде жұмысқа қабылдады.
Жасөспірімдер волонтерлік қызметке де ерекше қызығушылық танытып, жәрмеңкедегі мамандардан кеңінен ақпарат алды.
Жәрмеңкенің ерекшелігі – көптеген жас талапкердің ата-аналарымен бірге келуі. Бұл жасөспірімдерге өміріндегі алғашқы шағын сұхбаттарда өздерін сенімді сезінуіне мүмкіндік берсе, ата-аналар жазғы жұмыс орындарының қауіпсіздігі мен заңдылығына көз жеткізе алды.
Өткен іс-шара елордалық жастардың еңбек етуге және дербестікке ұмтылатынын көрсетті. Сонымен қатар кәсіпкерлер оларға лайықты еңбекақы төленетін заңды жұмыс орындарын ұсынуға дайын екенін аңғартты.
