Тараздың жеке балабақшаларының бірінде тәрбиеші аутизммен ауыратын төрт жасар баланың аяғын байлап, ұйықтатуға тырысты.
Оқиға бейнебақылау камерасына түсіп қалған, деп хабарлайды «Жетінші арна». Кадрларда баланың барынша қарсылық көрсеткені көрінеді. Соңында ол еденге құлап, басын жанындағы басқа кереуеттің арқалығына соғып алған.
Бала жарақат алғаннан кейін жедел жәрдем шақырылды. Травматология бөлімінде баланың басындағы жарасына тігіс салынды. Кейін ата-анасы оны үйіне алып кеткен.
Әйелдің тәрбиеші қызметіне сынақ мерзімімен қабылданғаны белгілі болды. Алайда кейін оның жұмысқа қабылданғаны туралы бұйрық рәсімделмегені анықталған.
Тараз қаласы Әулиеата аудандық полиция басқармасының бастығы Мергенбай Көйкеновтің айтуынша, аталған факті бойынша Қылмыстық кодекстің 140-бабының 2-бөлігімен сотқа дейінгі тергеу басталды. Оқиғаның барлық мән-жайын анықтауға бағытталған қажетті тергеу әрекеттері жүргізіліп жатыр.
«Тергеу қорытындысы бойынша іске қатысы бар тұлғалардың әрекеттеріне құқықтық баға беріліп, қолданыстағы заңнама аясында тиісті процестік шешім қабылданады», – деді ол.
Павлодарда төрт жасар қыз бала екінші қабаттың терезесінен құлап кеткен. Ол шұғыл түрде балалар облыстық ауруханасына жеткізілді.
