2025 жылғы 16 қазанда Қазақстан Республикасының Еңбек және халықты әлеуметтік қорғау министрлігінің баспасөз қызметі көпбалалы аналарға және отбасыларға төленген жәрдемақыларға қатысты кезекті статистиканы ұсынды.
Министрлік мәліметінше, 2025 жылдың басынан бері мемлекеттік жәрдемақылармен орта есеппен 847,7 мың адам қамтылған, жалпы төлем сомасы 449,8 млрд теңгені құрады. Оның ішінде:
• көпбалалы отбасыларға арналған жәрдемақыны 604,5 мың отбасы жалпы сомасы 391,1 млрд теңгеге алды;
• марапатталған аналарға арналған жәрдемақыны 243,2 мың адам жалпы сомасы 58,7 млрд теңгеге алды.
Толығырақ айтқанда, биылғы қыркүйек айында бұл төлемдермен 789,7 мың адам қамтылып, жалпы 45,5 млрд теңге төленді. Оның ішінде:
• көпбалалы отбасыларға — 544,9 мың отбасыға, сомасы 38,9 млрд теңге;
• марапатталған аналарға — 244,8 мың адамға, сомасы 6,6 млрд теңге.
Ведомствоның түсіндіруінше, көпбалалы отбасыларға арналған жәрдемақыны 4 және одан да көп бірге тұратын кәмелетке толмаған балалары немесе күндізгі бөлімде оқитын 23 жасқа дейінгі студенттері бар отбасылар, табыс деңгейіне қарамастан, ала алады.
2025 жылы төлем мөлшері балалар санына қарай сараланған:
• 4 баласы бар отбасыларға – 16,03 АЕК немесе 63 030 теңге;
• 5 баласы барларға – 20,04 АЕК немесе 78 798 теңге;
• 6 баласы барларға – 24,05 АЕК немесе 94 565 теңге;
• 7 баласы барларға – 28,06 АЕК немесе 110 332 теңге;
• 8 және одан да көп баласы барларға – әр балаға 4 АЕК, яғни 15 728 теңгеден төленеді.
Баспасөз хабарламасында сондай-ақ «Күміс алқа», «Алтын алқа» иегерлері мен бұған дейін «Батыр ана», «Ана даңқы» I және II дәрежелі ордендерімен марапатталған әйелдерге тағайындалатын жәрдемақы туралы да айтылған.
Марапатталған аналарға ай сайынғы жәрдемақы мөлшері:
• «Күміс алқа» иегерлеріне – 6,40 АЕК немесе 25 165 теңге;
• «Алтын алқа» иегерлеріне, сондай-ақ «Батыр ана», «Ана даңқы» I және II дәрежелі орден иегерлеріне – 7,40 АЕК немесе 29 097 теңге.
Еңбек министрлігі бұған дейін 2025 жылы бала туған кезде төленетін біржолғы жәрдемақы мөлшері туралы да еске салған болатын.
