ҚР Ұлттық экономика министрі Әсет Ирғалиев ведомствоның ең төменгі жалақыны арттыру жөніндегі жоспарлары туралы айтып берді.
«Мемлекет басшысының халықтың әл-ауқатын арттыруға бағытталған 5 бастамасын іске асыру мақсатында мынадай іс-шаралар іске асырылатын болады. Біріншіден, ең төменгі жалақы 2022 жылдың 1 қаңтарынан бастап 60 мың теңгеге дейін ұлғайтылады», — деді Әсет Ирғалиев Үкімет отырысында.
Екіншіден, бизнесті өз қызметкерлерінің жалақысын арттыруға ынталандыру шаралары әзірленетін болады.
«Үшіншіден, ЕТҚ жүктемесін 2023 жылдан бастап 34% — дан 25% — ға дейін төмендетуді көздейтін микро және шағын бизнес үшін еңбекақы төлеу қорынан бірыңғай төлемді енгізу жоспарлануда. Төртіншіден, азаматтық қызметшілердің жекелеген санаттарының жалақысын жыл сайын 2022 жылдан 2025 жылға дейін 20% — ға ұлғайту көзделіп отыр. Бесіншіден, ең төменгі жеткіліктілік шегінен жоғары зейнетақы аударымдарының бір бөлігін Тұрғын үй сатып алу үшін «Отбасы Банкіндегі» шотқа аудару мүмкіндігі берілетін болады», — деп атап өтті министр.
Естеріңізге сала кетейік, 1 қыркүйекте Қасым-Жомарт Тоқаев Парламенттің екі палатасының бірлескен отырысында Қазақстан халқына жыл сайынғы Жолдауын жолдады. Жолдауда Президент еліміздің әлеуметтік-экономикалық дамуының алдағы кезеңге арналған басым мақсаттарын жария етті.
