Қазақстанда автокөлік тасымалдарында электрондық жеке куәлікті пайдалану заңдастырылған.
Қазақстандықтарға жеке куәлікті қағаз тасығыштағы жеке куәлікпен тең цифрлық форматта пайдалануға мүмкіндік беретін жолаушылар мен багажды автомобиль көлігімен тасымалдау қағидаларына өзгерістер енгізілді.
Атап айтқанда, ауданаралық (қалааралық,облыстық) маршруттарда автобустармен жол жүру кезінде жолаушылар жеке куәлігін өз қалауы бойынша — түпнұсқада немесе электрондық құжат нысанында цифрлық құжаттар сервисі арқылы (ұялы телефон арқылы) ұсына алады.
Сондай-ақ, автовокзалдарда, автостанцияларда, жолаушыларға қызмет көрсету пункттерінде цифрлық жеке куәлік бойынша билеттер сатып алу, халықаралық, қалааралық, облысаралық, ауданаралық (қалааралық) маршруттар бойынша жол жүру кезінде багаж алу мүмкіндігі көзделген.
Бұдан басқа, такси жүргізушілері рейс алдындағы және рейстен кейінгі медициналық куәландырудан өту кезінде жеке куәлікті қағаз тасығышта да, электрондық нысанда да пайдалана алады.
Жоғарыда аталған нормалар ҚР Индустрия және инфрақұрылымдық даму министрінің бұйрығымен (2021 жылғы 4 қазандағы № 524) ел Үкіметінің тапсырмасы бойынша цифрлық технологияларды дамыту және азаматтардың жеке куәліктерінің түпнұсқаларын өзімен бірге алып жүру қажеттілігінсіз өз құқықтарын іске асыру мүмкіндіктерін кеңейту үшін қабылданды.
