Микро қаржылық ұйымдар ұйымдастырушыларының мүлкіне 42,6 млрд теңге көлемінде тыйым салынды.
Алматыда алаяқтық және заңсыз кәсіпкерлік қызметке күдікпен ілінген алты микрокаржылық ұйымға қатысты іс сотқа жолданды. Бұл туралы қалалық экономикалық тергеу департаментінің орынбасары Сабырғали Балғалиев РСК-де өткен брифингте хабарлады.
Наурыздың соңында Қаржы мониторингі агенттігі Creditum, Sofi Finance, Hava Finance, SF Offline, POS Credit, «Салем Кредит» компанияларының басшыларына қатысты тергеу жүргізіліп жатқаны туралы мәлімдеген еді. Тергеу нұсқасы бойынша, төлем мерзімі өтіп кеткен ұйымдардың қарыз алушыларын байланысты компаниялармен кепілдік келісім-шартқа отыруға мәжбүрлеген. Осы қызмет үшін бастапқы несие сомасынан бірнеше есе жоғары ақы алынған. Нәтижесінде қарыз алушылар несие сомасынан үш-бес есе көп төледі.
Сәуірде зардап шеккендердің саны 327 мыңнан астам адамға жеткені және келтірілген зиян 30 млрд теңге болғаны белгілі болды. Сол кезде Алматы прокуратурасы барлық зардап шеккендердің мүддесі үшін сотқа талап арыз берген.
Балғалиевтің сөзінше, Микро қаржылық ұйым ұйымдастырушыларының мүлкіне 42,6 млрд теңге көлемінде тыйым салынған.
«Өтінішпен жүгінген зардап шеккендерге зиян толық өтелді. Негізгі қарыз бойынша 1,6 млрд теңге мөлшерінде қарыз өшірілді. Сонымен қатар, Алматы прокуратурасы әлеуметтік осал санатқа жататын 60 мыңнан астам азаматтың құқықтарын қорғау үшін талап арыз берді», – деді ол.
