Мүгедектігі бар жандарға арналған арбамен жүріп-тұратын Қостанай тұрғыны көптен күткен пәтеріне қол жеткізген. Алайда оның айтуынша, жаңа үйдегі кедергісіз орта тек формалды түрде жасалған. Қауіпсіз кіреберістің орнына жасалған тік еңіс қазірдің өзінде қиындық туғызып отыр. Ал тұрғындар қыста бұл жолдың нағыз сынаққа айналуы мүмкін деп алаңдайды.
Қостанай тұрғыны Азамат Елемесов жаңа пәтеріне биыл наурыз айында көшіп келген. I топтағы мүгедектігі бар азамат баспананы жеңілдетілген ипотека бағдарламасы арқылы алған.
Алайда қоныс тойының қуанышы ұзаққа созылмады: оның айтуынша, подъезге жасалған кедергісіз кіреберіс қауіпсіз емес болып шыққан. Еңістің тым тік болуына байланысты өздігінен жоғары көтерілу және төмен түсу үлкен физикалық күшті талап етеді. Ал мүмкіндігі шектеулі жандардың көпшілігі үшін бұл еңсерілмейтін кедергіге айналуы мүмкін.
Қостанай тұрғыны Азамат Елемесов мүгедектігі бар жандарға арналған арбамен жүреді. Ол пандусы жоқ үйден пәтер алған. Подъезд маңы мен тротуарда тұтастай еңіс бар. Тұрғындар көктайғақ кезінде оның қауіпті сырғанаққа айналуынан алаңдайды.
«Тұрғын үй-коммуналдық шаруашылығына жүгіндім. Олар бұл жерге жобада тұтқалар қарастырылмағанын айтты. Бірақ көтерілетін жер соншалықты тік болғанда, тұтқалар қалай қарастырылмаған? Қыс келіп, бәрі көктайғақ болып жатса, подъезге қалай кірмекпін? Көктемде де осындай жағдай болған, сол кезде ол жерге өз бетіммен көтеріле алмадым. Қазір жаздың өзінде артқа қарай сырғып кетіп, жолға шығып кетемін бе деп қорқамын. Ал көлік келе жатса, қағып кетуі мүмкін», – дейді Азамат Елемесов.
Сонымен қатар тұрғындар үйде тұтқалардың жеткіліксіз екенін айтып шағымдануда. Олардың сөзінше, бұл қарт адамдарға, мүгедектігі бар жандарға және қозғалысы шектеулі басқа да тұрғындарға қиындық туғызып, қауіп-қатерді арттырады.
Подъезге кіреберіске дейінгі көтерілетін жолдан бөлек, тротуарға қатысты да сұрақтар туындап отыр. Ол арқылы да еңіспен жүруге тура келеді. Оның үстіне, бұл мәселе тек мүгедектігі бар адамдарға ғана емес, балалар арбасымен жүретін аналарға да қиындық туғызады.
«Тротуармен еңіспен жүргенде, арба автоматты түрде бір жаққа қарай сырғып кетеді. Ертең қыс келеді, ол жерге көтеріле алмаймын, оған шамам жетпейді. Менен бөлек, бұл үйде арбамен жүретін басқа да адамдар тұрады», – дейді Азамат Елемесов.
Қостанай әкімдігі Tengrinews.kz редакциясының сауалына берген жауабында «Береке» шағын ауданындағы №15 үйдің жобалық-сметалық құжаттамасы 2021 жылғы шілдеде кешенді ведомстводан тыс сараптамадан оң қорытынды алғанын хабарлады.
«Жобада қарастырылған бұл кіреберіс тобы пандус болып саналмайды. Бұл тұрғын үйге кіру үшін кедергісіз қолжетімділікті қамтамасыз ететін көтерілетін жол және ол барлық нормативтік талаптарға сәйкес келеді. Нормативке сәйкес, биіктік айырмасы 0,45 метрден асқан жағдайда қоршаулар орнатылуы қажет», – деп жауап берді Қостанай әкімдігі.
Әкімдік сондай-ақ үйдегі құрылыс-монтаж жұмыстарын жүргізген мердігермен әңгімелесуден кейін көтерілетін жолдың бір жағына тұтқалар орнату туралы шешім қабылданғанын хабарлады.
Жергілікті тұрғындар қауіпті кедергісіз орта мәселесін ғана емес, өздерінің айтуынша, үй құрылысының сапасыздығына қатысты мәселені де алғаш рет көтеріп отырған жоқ.
«Жаңбыр жауған кезде шатырдан су өтеді, ал тиімді су бұру жүйесінің болмауына байланысты жертөлені су басады. Жоғары ылғалдылықтың салдарынан кейбір пәтерлерде көгеру мен сыз пайда болған, ал линолеумнің астындағы едендер су болып жатады. Үш подъездің де кіреберіс топтары қанағаттанарлықсыз жағдайда: есіктер дұрыс жабылмайды», – дейді Қостанай тұрғыны Юлия Кан.
@kst_pulse_media
«Береке» шағын ауданындағы №15 үйдің тұрғындары қоғам мен жауапты органдардан үйде әлі де сақталып отырған көптеген мәселеге назар аударуды сұрайды.
Тұрғындардың айтуынша, жаңбыр жауған кезде шатырдан су өтеді, ал тиімді су бұру жүйесінің болмауы салдарынан жертөлені су басады. Жоғары ылғалдылық кейбір пәтерлерде көгеру мен сыздың пайда болуына әкелген.
Сонымен қатар линолеумнің астындағы едендер су болып қалады.
Үш подъездің де кіреберіс топтарының жағдайы қанағаттанарлықсыз: есіктер дұрыс жабылмайды, кейде ашық қалып қояды және үйді жауын-шашын мен суықтан тиісті деңгейде қорғамайды.
