Қазақстандық Тұрсынай Қабыл Азия Пара ойындарының күміс жүлдегері атанды
Қазақстандық спортшы Тұрсынай Қабыл Жапонияның Нагоя қаласында өтіп жатқан V Азия Пара ойындарында күміс медаль жеңіп алды. Ол пара пауэрлифтингтен 41 келіге дейінгі салмақ дәрежесінде екінші орын иеленді.
19 қазанда Тұрсынай Қабыл үш мүмкіндігінің үшеуін де сәтті орындады. Алғашқы талпынысында 100 келіні, екіншісінде 102 келіні, ал соңғы мүмкіндігінде 104 келіні бағындырды.
Осылайша, қазақстандық спортшы күміс медальға ие болды.
Аталған салмақ дәрежесінде 120 келі көтерген Қытай өкілі Цуй Чжэ алтын медаль жеңіп алды. Ал 97 келі нәтижемен Индонезия спортшысы Ни Ненгах Видиасих қола жүлдегер атанды.
Еске салайық, бұған дейін қазақстандық Еркін Ғаббасов оқ атудан Азия Пара ойындарының алтын медалін жеңіп алған болатын.
V Азия Пара ойындарының ашылу салтанаты Жапонияның Нагоя қаласында өтті. Ойындарға 45 елден шамамен 4 мың спортшы қатысуда. Қазақстан құрамасы 12 спорт түрінен 150 спортшымен сынға түсіп жатыр.
V Азия Пара ойындары қарсаңында ұлттық делегацияларды қарсы алу рәсімі өтті. Салтанатты шара барысында қатысушы елдердің тулары көтеріліп, мемлекеттік әнұрандары орындалды.
Жарыстың ресми ашылуына дейін қазақстандық спортшылар пара үстел теннисі мен боччадан 10 жеңіске қол жеткізді.
