Қазақстан Президенті Қасым-Жомарт Тоқаев Еңбек және халықты әлеуметтік қорғау министрі Светлана Жақыпованы қабылдады. Мемлекет басшысы әлеуметтік-еңбек саласындағы мемлекеттік саясаттың негізгі бағыттарының іске асырылуы жөніндегі есебін тыңдады.
Мәселен, Ақорданың 3 желтоқсандағы мәліметінше, Жақыпова халықты жұмыспен қамтуға жәрдемдесу шаралары туралы айтып берді.
Қазіргі уақытта азаматтарды 2029 жылға дейін жұмысқа орналастыру жоспарының 83%-ы орындалды, бес жыл ішінде 2,7 миллион адам жұмыспен қамтылды. Өңірлік жұмыспен қамту карталары және сапалы жұмыс орындарын құруға арналған жыл сайынғы KPI жүзеге асырылуда.
Мемлекет басшысына биылғы 10 айда атаулы әлеуметтік көмек алушылар саны 30%-ға азайғаны туралы хабарланды. Бұл ресурстарды шынымен мұқтаж азаматтардың пайдасына қайта бөлуді мүмкін етті. Биыл 285,1 мың адамға 27,1 млрд теңге көлемінде атаулы әлеуметтік көмек көрсетілді.
Қасым-Жомарт Тоқаевқа өндірістік жарақаттанудың 6,5%-ға, ал өлім-жітімнің 4,5%-ға төмендегені туралы да мәлімделді.
Ұсынылған ақпаратқа сәйкес, 522 мыңнан астам адам Әлеуметтік қызметтер порталы арқылы қызмет алған, 27 мың азамат инватакси қызметін пайдаланды.
Президентке 2025 жылдан бастап ең төменгі базалық зейнетақы ең төменгі күнкөріс деңгейінің 70%-ына дейін көтерілгені, жыл сайын инфляция деңгейіне сай индексация жүргізілетіні баяндалды. Жұмыс берушілердің міндетті зейнетақы жарналары кезең-кезеңімен артып, 2028 жылға қарай 5%-ға жетеді. Жинақтаушы зейнетақы жүйесіне экономикалық белсенді халықтың 65%-ы қатысады.
Сонымен қатар, Светлана Жақүпова Қазақстан халқына Жолдауында Мемлекет басшысы берген тапсырмалардың орындалуы жөнінде есеп берді.
Министрлік мемлекеттік қызметтерді көрсетудің Бірыңғай цифрлық платформасын енгізу бойынша белсенді жұмыс жүргізуде. Бұл платформа азаматтарды қолдау шараларын ұсынуда дәл бағытталған және барынша тиімді тәсілді қамтамасыз етуге тиіс.
Кездесу қорытындысы бойынша Мемлекет басшысы жұмыспен қамтудың сапасын арттыруға, әлеуметтік қолдау көрсету процестерін одан әрі цифрландыруға, еңбек қауіптерінің алдын алуды күшейтуге, зейнетақы жүйесін және көші-қон саясатын жетілдіруге бағытталған бірқатар тапсырма берді.
Бұдан бұрын Тоқаев Премьер-министрдің орынбасары – мәдениет және ақпарат министрі Аида Балаеваны қабылдаған болатын. Ол мемлекеттік әлеуметтік саясатты іске асырудың негізгі бағыттары туралы, атап айтқанда, ведомствоаралық өзара іс-қимылды күшейту, қызметтердің сапасын арттыру, адами капиталды дамыту және саланы цифрландыру шаралары туралы баяндады.
