Солтүстік Қазақстан облысында 26 мамыр мен 19 маусым аралығында жазғы мектеп жұмыс істейді деп жоспарланып отыр.
Білім бөлімінің басшысы Гүлмира Каримова мектеп орта және жоғары сынып оқушылары үшін ашық болады деп мәлімдеді. Мектеп жұмысы екі бағытта ұйымдастырылатын болады: олимпиадалық резерв мектебі және білім кемшіліктерін толтыру мектебі. Мектепте математика, тілдер және жаратылыстану ғылымдары бөлімдері жұмыс істейді.
«Сабақтар санитарлық қауіпсіздік стандарттарына сәйкес офлайн тәртіпте өтеді. Олимпиадалық резерв мектебі мектеп оқушыларын олимпиадалар мен ғылыми жобаларға дайындайды. Әр бала жоспарлы түрде жазғы мектепке бара алады. Оқушыларға сабақ кестесі жасалады: бірнеше негізгі пәндер — математика, тілдер, тарих және факультатив пәндері: биология, химия, география, физика пәндері оқытылады», — деп түсіндірді Г.Каримова.
Жазғы мектепте білім беру ата-аналардың немесе заңды өкілдердің өтініштері негізінде ақысыз түрде жүргізіледі. Мектеп формасы қажет емес.
Источник: inform.kz
